في يوم كده، التلاميذ راحوا لربنا يسوع وسألوه: ياترى مين الاعظم في ملكوت السموات؟! وطبعا متوقعين ردود بقى فظيعه، الاعظم ده ممكن يكون رتبه كنسيه، بيعمل معجزات، ايده بتطلع نور من كتر ما رافع ايده في الصلاة.. بس يسوع مقالش حاجه من دي، جاب طفل صغنن ووقفه في النص وسيلة ايضاح لكلامه..وقال لهم.. اللي عايز يبقى عظيم في الملكوت.. يبقى شبه الطفل ده!!
دة صعب مش سهل، لأن عشان نبقى زي الأطفال .. ده فيه جهاد وصعب.. فيه بساطه من غير عقد ولا كلكعه للأمور.. فيه أحشاء رأفه وحنيّه وكلام حلو عفوى كله حب واحساس.. فيه بهجه بوجودهم مش نكد وزعل.. فيه براءة ومفهوم مختلف عن الخطيه وفيه تسليم كامل لبابا وماما بثقه انهم مش هيأذوني أو يغدروا بيّ، بالعكس عايشيين في أمان طول الوقت.. فيه قلب حلو مش بيشيل حاجه وحشه لحد .. فيه نسيان للوحش.. فيه اتضاع، ممكن يبقى واثقين في نفسهم مش بتوصل لكبرياء .. الأطفال دول كائنات جميله مبهجه بسيطه متضعه♥️🌹 يسوع قادر يدينا نكون شبه الأطفال عشان نقدر نعيش السما واحنا على الأرض والعالم كله يتغير بسبب ان قلوبنا تتحوّل لقلوب أطفال🌹🌹 مفهاش صراع ولا مين اعظم.. كل حد فينا امين في وزناته وبيربح بيها من غير ما يدفنها🙏💞💞
تعليقات
إرسال تعليق