ايوة منتظرة ..

 موقفين في الپوست أعمق من بعض.. دخول ربنا يسوع للتلاميذ والأبواب مغلّقه والتاني بقى مشيه على ال مياه.. هو الموقف التاني ده له حدوته جميلة اوي.. في يوم كده يسوع قال لتلاميذه: يلا اسبقوني للعبر، اركبوا السفينه وانا هصرف الناس وهاجى وراكم علاطول.. صرف الناس وراح الجبل يصلي.. في التوقيت ده كان التلاميذ وسط البحر بالسفينه وهيجان ريح فظيع.. وفجأه.. شافوا يسوع جاي ماشي على الميه.. انزعجوا وخافوا.. هزيع رابع من الليل والدنيا كحل وشايفينه ماشي على الميه.. ايه فيلم الرعب ده🙈 فقالوا أكيد خيال.. وقعدوا يصرخوا جامد من الخوف.. يسوع لما شافهم كده قال لهم: ايه فيه ايه مالكم؟! اتشجعوا كده أومال.. متخافوش.. انا هو.. كلهم بصوا له كده وبصوا لبعض مستغربيين ومش مصدقيين، بس خايفين يعلنوا مشاعرهم دي او متعودوش ممكن.. المهم سكتوا.. مين بقى المتحدث الرسمي اللي مبيخافش وجريء ويشعر باللي حواليه ويتكلم عنهم؟! بطرس💪💪🥰🥰 قال له: طب بص لو انت فعلاً يسوع .. خليني أمشي زيك على الميه.. بمنتهى الهدوء، يسوع قال له: تعال..كان متوقع يقول له: ما تتعلم من اخواتك.. كلهم مصدقين وساكتين اهو.. اشمعنى انت اللي عايز كده، وبعدين انت بتشك في قدراتي وكمان مش عارفني ويرميه في البحر ونخلص من الصداع والقلق اللي عامله بطرس.. لكن محصلش كده من يسوع، قال له تعال.. نزل بطرس و هوپ لقى نفسه مشي على الميه عشان يروح ليسوع.. بس مسكين خاف وابتدا يغرق.. وقعد يصرخ.. يارب الخقني هغرق.. يسوع مدّ ايده في الحال، كان ممكن يسيبه يغرق عشان يبقى درس لأي حد يشك في يسوع، بس يسوع اعلى بكتير من الحته دي، هو بيحبّ وبس👌 قال له: انت كنت ماشي حلو .. شكيت ليه يا قليل الإيمان.. هو انت يارب يعني لسه اخد بالك ان بطرس شاكك فيك وايمانه قليل؟! ده بقى له ساعه ونص مبطلش مقاوحه ومجادلة وتشكيك.. ما هو عشان يسوع رقيق وطيب.. مش بيتصرف معانا غير بكل حبّ ورقّه.. مش تحدّي.. طب تعال لي بقى وانا هوريك انا مين.. هما كلمتين عتاب رقيق وفي وقتهم بعد ما انقذه من الغرق.. وخلصت الحدوته خلاص .. دخلوا السفينه والريح هدت.. وكل الناس عرفت انه يسوع وسجدوا له وهم بيقولوا له: بالحقيقه انت ابن الله.. تعاملات ربنا يسوع منتهى الرقّه والحب.. واللي يقرب منه بيبقى شبهه مبيعرفش يعمل حاجه غير انه يحبّ، اوقات بيترجم غلط، بس مش بيفرق.. لأنه ببساطه متأكد ان يسوع شايف كل اللي حاصل والوحيد اللي عارف جوة قلب كل حد فينا♥️♥️♥️